ҚАЙРАН АРЫС…

Көрнекті ақын Ғалым ЖАЙЛЫБАЙ ағамыз Арысқа жыр арнапты. Оқыңыздар, ағайын!

ҚАЙРАН АРЫС…

Құдайсыз қару алса қуды ата ма,
Қуды атып дүниені шулата ма?
Аңқыған алқап еді қауын исі – 
Ауылыңда не боп жатыр, Дулат аға!

Дүние-ай,
Арыс қайда, 
Арыс қайда,
Баянсыз бақыт бізден алыстай ма.
Тасыған көңіліме су сепкендей –
Басынан байтақ елдің бақ ұшпай ма?..

Жанымның жылғаларын жайлады ағыс,
Ақ құсым алқабымды аймалап ұш!
Қамшының сабы еді ғой қара орман жұрт – 
Шәмшінің әні еді ғой, қайран Арыс!

Естілсе ер бабамның сазы алыстан
Басынан ел емес ек базары ұшқан…
…Шерімді өлең саған тарқатайын –
Беліңді бекем буын, Қазақстан!

Білетін нар қадірін,
бар қадірін,
Арысым, айналайын, арналы ұғым,
… Төзімнің төңкерілген қазаны едік – 
Көзіңнің жасын сүртсін арда жырым.

Беу, Арыс,
Тілеуіңде бәрі сенің,
Шеменге айналмасын тағы шерім…
…Заман бол,
бозторғайым – ұя салар –
Аман бол, Арыстағы арыс елім!

Ғалым ЖАЙЛЫБАЙ